ඔබෙ මතක රැඳී තිබු
සමරු පොත් පිටු අතර
එකින් එක අකුරු මත
මා ඇඟිලි තුඩු යවමි
ඔබට මම මටද ඔබ
අමතකව ගිය දිනෙක
පවා ඒ අකුරු මැද
මම නුඹේ රුව දකිමි
කැප්රි විලවුන් සුවඳ
සොරා ගෙන තවරගත්
පිටු දෙකක් හෝ තුනෙක
මතක සුවඳක එතෙමි
ඉඳහිටක මදනලෙක
දඟ කරන කෙහෙරලක්
ඇඟිලි තුඩගින් රැගෙන
සවන් පත් මත හොවමි
එදා මෙන් තවම මට
ආදරේදැයි කියා
නො අසාම නෙත් අතර
පිපෙන සෙනෙහස විඳිමි
දුරම දුර අතීතෙක
එකම මොහොතක වුවත්
අප ලවන් මුණගැසුණු
ඉසිඹුවට ගිහින් එමි
එරා
No comments:
Post a Comment